नेत्री भुसाललाई ऊर्जा, जलस्रोत तथा सिँचाइ मन्त्रालयको जिम्मा

काठमाडौँ । मुलुकको अर्थतन्त्रको मेरुदण्डको रूपमा रहेको ऊर्जा, जलस्रोत तथा सिँचाइ मन्त्रालयको जिम्मेवारी नेकपा (माओवादी केन्द्र) का नेत्री फम्फा भुसालले पाएकी छन् ।  विसं २०६४ मा महिला बालबालिका तथा समाज कल्याणमन्त्री, २०६५ मा सामान्य प्रशासनमन्त्री र विसं २०६८ मा शान्ति तथा पुनःनिर्माण मन्त्रालयको जिम्मेवारी सम्हालेकी मन्त्री भुसाल माआवादी जनयुद्धको क्रममा १० वर्ष भूमिगत बसेकी थिइन् ।  विसं २०१९ साउन ४ गते अर्घाखाँचीमा जन्मिएकी भुसाल ललितपुर क्षेत्र नं ३ बाट विसं २०७४ मा भएको प्रतिनिधिसभा निर्वाचनमा प्रत्यक्ष निर्वाचित सांसद् हुन् । यसअघि विसं २०६४ मा संविधानसभा सदस्य निर्वाचित भएकी थिइन् ।  उनी तत्कालीन संयुक्त जनमोर्चा नेपालको महासचिव र अध्यक्ष भएकी थिइन् । विसं २०३३ मा अनेरास्ववियु छैटौँको सदस्यता लिई राजनीतिक जीवन सुरुआत गरेको भुसाल नेकपा (माओवादी केन्द्र)को प्रभावशाली नेत्री हुन् ।  माओवादी केन्द्रको स्थायी समिति सदस्य रहेकी नेत्री भुसालको विशेष रुची अर्थतन्त्र र विकासमा रहेको छ ।